बर’ फरायसा आफादआ नोगोरारि सोदांनाय बिल 2016 आरो गोजौ थाखोनि सुबुंफोरनो ST गनायथि होनायखौ बेरेखा खालामदों

क’कराझार,जानुवारि 10: मिरु बर’ फरायसा आफादनि 51थि बोसोरारि जुथुमाया बाक्सा जिल्लानि कुमारिकाता गोजोन फोथाराव गाजा गोमजायै बुधबाराव जोबनानै थांबाय।

बर’ फरायसा आफादनि बुंथिगिरि जयन्त बसुमथारि बिथांआ बुङोदि, 51थि जथुमानि गेजेरजों बर’फोरनि माखासे गोथौ जेंनाफोरखौ सावरायनानै मावफारिया लानाय जादों। बिथांआ फोरमायदोंदि, मिरु बर’ फरायासा आफादआ मेलनि गेजेरजों नोगोरि सोदांनाय बिल 2016 नि सायावबो सावरायदों आरो हादोरसायाव थानाय गुबुन गुबुन थागिबि सुबुंफोरनि मोन्थायखौ रैखाथि होनो थाखाय गुबुन गुबुन मोन 30 आफादफोरनि बिलनि बेरेखा खालामनानै धर्ना होनायखौ हेफाजाब होगोन होन्ना मिथिहोयो।

बे समावनो मिरु बर’ फरायसा आफादआ हादोरसायाव थानाय मोन 6 गुबुन गुबुन गोजौ थाखोनि हारिसाफोरनो सेडियुल ट्रायबनि (ST) गनायथि होनो नागिरनायखौ बेरेखा खालामगोन होन्ना मिथिहोयो, जाय बिथांमोनहा ST नि थाखाय गनायजाथाव आखुथाय (Criteria) फोर गैया आरो बिलआ हादोरसानि थाखाय सेडियुल ट्रायब सुबुंफोरनि मोन्थायखौ खहा खालामगोन।

“जुदि माखासे गोजौ थाखोनि सुबुंफोरखौ सेडियुल ट्रायबनि फारिलाइआव दोनगोन, अब्ला थाखानाय ट्रायबेल सुबुंफोरा हा-हुनि मोन्थाय, राजखान्थिनि मोन्थाय, सोलोंथायनि मोन्थाय, साख्रि बाख्रिनि मोन्थाय आरो रांखान्थिनि मोन्थायफोरा गोमालांजोबगोन” होन्ना बसुमथारि बिथांआ बुंबावो।

थागिबि बर’ सुबुंफोरनि सिनायथि, हारिमु, हा-हु आरो राजखान्थि मोन्थायखौ रैखाथि होनो थाखाय गोलाव सम जालांनाय आलादा राज्यो “बर’लेन्ड” दाफुंनाय थांखिखौ लानानै फरायसा आफादआ सोमावसारलांबाय थागोन आरो डेम’क्रेटिक मोन्थोरजों गोख्रोंनिफ्राय गोख्रोंसिन खालामलांबाय थागोन होन्ना बिथां बसुमथारिआ बुङो।

डिलिगेतनि जथुमाया मिरु बर’ फरायसा आफादनि गोख्रों मावफारिया लानायनि थांखिखौ होफाजाब होयो। बे मावथांखिनि गेजेरजों बर’फोरनि फारफ्रोमबो बिथिंआव जौगाखांनाय लाबोनो थाखाय गोगो सोलोंथाय (Mission Quality Education) होनाया मोनसे गुबै थांखि। जथुमानि गेजेरजों बिथांमोनहा बर’ मेडियाम सोलोंसालिफोरखौ जोथोनलानो खावलायनायजों लोगोसे गोदान बोसोरारि सोलोंथाय (New Academic session) जागायनायनि सिगां थाखोनि फराय बिजाबफोरखौ रान्नानै होनो खावलायहरो आरो आफादनि दाबिफोरखौ जाफुंसारहोनो खावलायहरो।

        बसुमथारि बिथांआ मिथिहोबावोदि, बर’ फरायसा आफादआ बर’ समाजनि गेजेराव सोलिबोगासिनो थानाय खोमथि फोथायनाय, दायना बुथारनाय, उन्दै बैसोआव हाबा जानाय, जै एबा फेग्रा बेसाद बाहायनाय, जुवा गेलेनाय बायदि बायदि बिथिंफोरखौ होबथानो थाखाय आरो बर’ हारिनि गेजेराव खहा गोयै सोलायनाय एबा ‘Bodofa Mission for Sustainable Change’ नि  गेजेरजों हाबा मावलांबाय थागोन”।

बावैसो सिगां बीटीसी खुंथायनि गाहाय हाग्रामा मलिहारिआ गोदान दिल्लीआव थांनानै गावनि खुगाजों खौरांगिरिफोरनि सिगांआव बर’फोरा आलादा राज्यो दाफुनायनि मोन्थाय गैया, बड’लेन्ड हालामाव खारखाना गैया, नांगौबादि फंसंथानफोर गैया, IAS/IPS ऑफिसारफोर गैया, आरो बर’ फरायसा आफादनि बड’लेन्ड दाबिनाया मोनसे नाटक दिन्थिनायसो होन्नायखौ मिरु बर’ फरायसा आफादआ गोख्रों रादजों सोंखारिदों।

बिथांमोनहा प्रेस बिबुंसारनि गेजेरजों फोरमायहरदोंदि, हाग्रामा महिलारिआ गावनि सुंथाब मेलेमजों सान्नानै बेफोरबादि राव बुंनाया गेदेमा बर’ दैदेनगिरिफोर जेरै बडफा उपेन्ड्र नात ब्रम्ह, प्रेमसिं ब्रम्ह, आरो बिर सिलागां बसुमथारि बिथांमोनखौ लाजि फोनांयजों लोगोसे सा 5000 रोजा मुंख्लंफोरखौ लाजिफोनांनायसो, जाय बिथांमोनहा बर’ हारिनि सिनायथि, राव, हारिमु, हा-हु आर थामोन्थाफोरखौ रैखाथि होनो जुजिनानै जिउ गोमालांबाय आरो बिथांनि बेबादि बुनाय रावआव साफ्रोमबो बर’ माहारिनि गोसोआव दुखु फोनांबाय होन्ना बिथांमोनहा फोरमायहरो।