हिन्दु बांग्लादेसिफोरनि थाखाय बीटीएडीआव जायगा गोया: प्रमिला रानि ब्रम्ह

गुवाहाटी,जानुवारि 10: हादोरसा समाज जौगाखां बिफान्नि मंत्री प्रमिला रानि ब्रम्ह बिथांआ थोंजोङै मिथिहोयोदि, बीटीसी खुंथाया जायखिजाया हिन्दु बांग्लादेसिफोरनो बीटीएडी ओनसोलाव जायगा होआ।

बड’लेन्ड पिपल्स प्रन्ट राजखान्थि दोलोनि मंत्री प्रमिला रानि ब्रम्ह बिथांआ बुंधबारखालि गुवाहाटी नोगोरमायाव खौरांगिरिफोरजों मोगा मोगिआव बुङोदि, “नोगोरारि सोदांनाय बिल 2016 आ बड’लेन्ड टेरिटरियेल एरिया दिसट्रीक (बीटीएडी) ओनसोलाव जेबो गोहोम गोग्लैया, रावबो जोंनि सायाव हिन्दु बांग्लादेसिफोरखौ जाबसिननानै होनो हाया, जुदि सोरबाफोर जोंनि सायाव जाबसिन्नो नाजागोन, अब्ला जों बिलनि बेरेखायै गसंथागोन” होन्नानै प्रमिला रानि ब्रम्ह बिथांआ बुङो।

 “आं असम गन’ फरिसद (एजिपि) नि थांखिखौ मानियो, जाय दोलोआ हादोरसायाव थानाय सुबुंफोरनि लुबैनायखौ बुजियो आरो बेबादिनो जोनोम मोनदोंमोन, बिथांमोनहा हादोरसा सुबुंफोरनि लुबैनायनिफ्राय जानगार जानो हाया, बिथांमोनहा थार थांखि लादों” होन्ना ब्रम्ह बिथांआ बुंबावो।