गुवाहाटी,डिसेम्बर 11: सा-सान्जा भारतआ हादोरनि सुबुं लांखारग्राफोरनि थाखाय मोनसे मोजां जायगा जाबोगासिनो दं। 2011 माइथायनिफ्राय 2017 माइथायसिम आसाम हादोरसानिफ्रायनो गासै 1,185 सुबुंफोरखौ लांखारदोंमोन, आरो 722 सुबुंफोरखौ हादोरनि गुबुन गुबुन जायगाफोरनिफ्राय रैखाथि होफिन्नो हादोंमोन।
गोजौआव मखनाय समनि गेजेराव गासै 895 सुबुं लांखारनाय जाथायफोरखौ IPC 370A नि 370थि दफानि आयेन बादियै रेजिस्तार खालामनो हादोंमोन। गासै 722 सुबुं लांखारजानायफोरखौ रैखाथि होनो हानायजों लोगोसे 659 सुबुं लांखारग्राफोरखौबो खानो हादोंमोन।
फारसेथिं सुबुं लांखारग्राफोरा गिबिआवो गुबैयै गुवाहाटी नोगोर फारसे लानानै फैयो आरो गुवाहाटीनिफ्राय रेल गारिजों हादोरनि गुबुन गुबुन जायगाफोराव लानानै थाङो।
मानि थाखाय बेफोरबादि जानो खाबु मोनबोगासिनो दं? खौरां मोन्नाय बादिब्ला आसाम आरो गुबुन हादोरसाफोरनि माखासे ओनसोलफोराव मोजाङै जिउ खुंनो हानाया गोब्राब। सुबुंफोरा खामानि मोनै (Jobless) आरो न’गोयै (Homeless) जेंनाफोरजों मोगा मोगि जाबोगासिनो दं। गुबैयै आसाम हादोरसायाव दैनि बाना, हिंसायारि जाथाय, गरिब, आरो बायदि बायदि, जाहोन्नि थाखाय सुबुं लांखारग्राफोराआसाम हादोरसानिफ्राय गोरलैयैनो सुबुं लांखारनो हायो।
मखजाथावदि, आसाम हादोरसानि जिल्लाफोर फारियै-क’कराझार, उदालगुरि, शनितपुर, मरिगांव, कार्बि आंलं बायदि बायदि जिल्लाफोर, जाय जिल्लाफोरा बैफोर जेंनाफोरजों मोगा मोगि जाबोगासिनो दं। बेफोर जाहोन्नि थाखाय नंखाय साख्रिनि मुं लानानै साख्रि होगोन होन्नानै सुबुं लांखारग्राफोरा देहायारि फालांगिफोरावसो बांसिन गोसो होबोनायखौ नुनो मोन्नाय जादों। खायसे सुबुंफोरा गावनि गोसो गाज्रिनि थांखि लानायखौबो नुनो मोनबोनाय जादों। फारसेथिं लांखारजानाय सुबुंफोरखौ बांसिनै मुम्बाइ, हारियाना, दिल्ली सिलिगुरि, आरो गुबुन गुबुन नोगोरमाफोराव बांसिन लांखारजानायखौ नुनो मोनबोनाय जादों।
आसाम हादोरयाव बैफोर जाथाय एबा सुबुं लांखारनायफोरखौ होबथानो थाखाय Anti-Human Trafficking Unit आरो NGO फोर दं, नाथाय बेफोर जाथायखौ होबथानो हागोना बिथांमोनि थाखाय सिमां बादिसो। बेफोर जाथायखौ होबथानो थाखाय गाव गावनि बिमा-बिफा, गामिनि समाज आरो ओनसोलनि सुबुं समाज सिबियारि आफादफोरा गोख्रों मावथाखि लानानै सिगांबोआब्ला होबथानो नाजानाया गोजौआव मोफौ हायाव बाहागो एबा सालखुन्थानि रोदा नागिरनाय बादिसो जागोन।
Comments
Post a Comment